ချဲလ်ဆီး ပရိသတ်တွေ အပေါ် တိုက်ခိုက်သွားတဲ့ သောမတ်စ်ဖရန့်

တမြန်နေ့ညက ကစားသွားတဲ့ အနောက်လန်ဒန်ဒါဘီ ပရီးမီးယားလိဂ်ပွဲမှာ ချဲလ်ဆီး အသင်းနဲ့ ဘရန်းဖို့ဒ် အသင်းတို့ တစ်ဖက် ၂-ဂိုးစီ သရေရလဒ်နဲ့ အတူ တစ်မှတ်စီ ခွဲဝေယူသွားကြပါတယ်။ ဒီပွဲမှာ ခြင်္သေ့ပြာတို့ရဲ့ ခြေစွမ်းဟာ ဒုတိယပိုင်းအတွင်း ဆိုးဆိုးရွားရွား ကျဆင်းခဲ့ပြီး ၊ အိမ်ရှင် ပျားတို့ နိုင်လုနီးနီး အနေအထားကို ပိုင်ဆိုင်ခဲ့ပါသေးတယ်။

ပထမပိုင်းကို တိုက်စစ်မှူး နီကိုးလက်စ် ဂျက်ဆင်ရဲ့ ခေါင်းတိုက်ဂိုးနဲ့ ဦးဆောင်ခဲ့ပေမဲ့ ၊ ဒုတိယပိုင်း ပြန်အစကနေ နာရီဝက်လောက် ကြာတဲ့အထိ ချဲလ်ဆီးတို့ ခြေစွမ်း ၊ ကြိုးစားအားထုတ်မှု ၊ ချိတ်ဆက် ကစားပုံ အဖက်ဖက်က နောက်ကျခဲ့ပြီး ၊ အိမ်ရှင်ရဲ့ ဖိအားပေးမှုကို တောက်လျှောက်ခံခဲ့ရပါတယ်။

ဒီအတွက်ကြောင့် ဘရန်းဖို့ဒ်တို့ ချေပဂိုးကို ပြန်ရှာတွေ့ခဲ့သလို ဦးဆောင်ဂိုးကိုပါ ပွဲပြီးခါနီး ၁၀-မိနစ် ဝန်းကျင် စွမ်းဆောင်နိုင်ခဲ့တာ ဖြစ်ပါတယ်။ ထိုအတောအတွင်း အဝေးကွင်း ချဲလ်ဆီး ပရိသတ်တွေဟာ သူတို့ရဲ့ အမျက်ဒေါသတွေကို Fan chant တွေမှတစ်ဆင့် ပွင့်ပွင့်လင်းလင်း ထုတ်ပြခဲ့ကြပါတယ်။

ယင်းသံပြိုင်သီဆိုမှုတွေမှာ တော့ဒ်ဘိုလီနဲ့ လက်ရှိ အသင်းပိုင်ရှင်တွေကို တိုက်ခိုက်ရင်း ၊ ပိုင်ရှင်ဟောင်း ရိုမန် အေဘရာမိုဗစ်ခ်ျ ၊ ပရိသတ်တွေ အထူးချစ်ရတဲ့ အသည်းကျော် မန်နေဂျာဟောင်း ဂျိုဆေး မော်ရင်ညိုတို့ရဲ့ အမည်တွေကို သီဆိုခဲ့ကြပါတယ်။

ဒါ့အပြင် လက်ရှိ နည်းပြ မော်ရစ်စီယို ပိုချက်တီနိုကိုလည်း ပရိသတ်တွေက ‘ F**k Mauricio ‘ လို့ ဆဲဆိုအော်ဟစ်ခဲ့ကြပါတယ်။ ဘရန်းဖို့ဒ် နည်းပြ သောမတ်စ် ဖရန့်ကတော့ ဒီလိုမျိုး ကိုယ့်နည်းပြ ကိုယ်ပြန်ဆဲခဲ့ကြတဲ့ ချဲလ်ဆီး ပရိသတ်တွေအပေါ် တုန့်ပြန်တိုက်ခိုက်ရင်း ၊ ပိုချက်တီနိုဖက်မှလည်း အခုလိုပဲ ကာကွယ်ပေးသွားပါတယ်။

ဖရန့် က “ဟုတ်ပါတယ်။ ဒါကြောင့် ကျွန်တော် အနည်းငယ် စိတ်ပျက်မိတာပါ ။ သူတို့ ဘာကိုမျှော်မှန်းနေကြလဲဆိုတာ မသိပါဘူး ။ ဒါပေမဲ့ ပရိသတ်တွေ ဆိုတာက လိုတာထက်ပိုပြီး မျှော်မှန်းကြမှာပါပဲ။ ခြုံပြောရရင် မော်ရစ်စီယိုကို သူ လုပ်ပြထားတဲ့ ၊ လုပ်ပြနေတဲ့ အရာတွေနဲ့ ပတ်သက်ပြီး ကျွန်တော် အရမ်းလေးစားပါတယ် ”

“ကိုယ့်အသင်းအကြောင်း ထုတ်ပြောတဲ့ နေရာမှာ ခင်ဗျားဟာ အပေါင်းလက္ခဏာဆောင်တဲ့ အရာတွေပဲ အမြဲပြောမှာပါ။ နောက်ပြီး ဘယ်နေရာတွေမှာ ဘာလွဲနေလဲ ၊ ဘာလိုနေလဲ ဆိုတာ ထောက်ပြရပါတယ်။ ပြီးမှ ဝေဖန်ရေး အကြောင်းအရာတွေကို ဆက်ရမှာပါ”

“အမှန်အတိုင်း ပြောရရင် ကျွန်တော်တို့ အသင်းနဲ့ ချဲလ်ဆီးဟာ xG ( မျှော်မှန်းထားတဲ့ ပျမ်းမျှ ဂိုးအရေအတွက် ) ၊ အခွင့်အရေး ၊ ပျမ်းမျှရမှတ် စတဲ့ အချက်အလက်အရ ကံအဆိုးဆုံးအသင်းတွေ ဖြစ်ပါတယ်။ သူတို့ဟာ ဒီနှစ်ဘောလုံး ရာသီ တလျှောက် ကံဆိုးနေခဲ့တာပါ ”

“လီဗာပူးနဲ့ ကာရာဘောင်ဖလား ဗိုလ်လုပွဲမှာလည်း သူတို့ အတော်လေး ကံမကောင်းခဲ့လို့ ချန်ပီယံ မဖြစ်ခဲ့ပါဘူး။ အဲဒီပွဲမှာ သူတို့ အကြီးမားဆုံးသော အခွင့်အရေးတွေ ရခဲ့တာပါ။ ပြီးခဲ့တဲ့ တစ်ခေါက် သူတို့နဲ့ ရင်ဆိုင်ခဲ့တုန်းက သူတို့ဟာ ပိုကောင်းတဲ့ နေရာမှာ ရှိနေတယ် ၊ မှန်ကန်တဲ့ လမ်းကြောင်းပေါ်မှာ လျှောက်နေတယ်လို့တောင် ကျွန်တော် ပြောခဲ့ပါသေးတယ်။ ဒီတော့ သူတို့ ဒီအတိုင်း ရှေ့ဆက်ဖို့ပဲ လိုပါတယ်” လို့ ပြောကြားခဲ့ပါတယ်။

Source : football.london

#jdbkx.com #အားကစားသတင်း #ဘရန်းဖို့ဒ် #ချဲလ်ဆီး #သောမတ်စ်ဖရန့် #မော်ရစ်စီယိုပိုချက်တီနို  #ဂျိုဆေးမော်ရင်ညို #ရိုမန်အေဘရာမိုဗစ်ခ်ျ #Online   #Games  #Myanmar  #OnlineGamesMyanmar